Soziolingusitika Klusterrak EHUrekin elkarlanean egin duen “Jendaurrean erabili” proiektuaren bigarren faseari hasiera eman berri zaio.
Ekintza eta ikerketa uztartzen dituen proiektu honek, euskarazko komunikazio publikoa errazteko eta hobetzeko elkar laguntzako sarea jarri du abian. Euskarazko komunikazio publikoa burutzeko garaian zalantzak edo zailtasunak dituzten erakunde eta enpresei, jardun horretan laguntzeko baliabideak eskainiz. “Praktika Komunitate” bat hasi da osatzen horretarako, enpresa eta erakundeek haien esperientziak eta ezagutzak elkar partekatu eta horietatik aberasteko aukera emango duena.
Gaurdaino, izaera eta alor desberdinetako 9 erakundek parte hartu dute proiektuan eta haiek osatu dute praktika komunitate horren lehen taldetxoa. Orain, proiektuaren bigarren faseari hasiera eman zaio, egitasmoa gizarteratuz eta ezagutzera emanaz, eta beraz hemendik aurrera gai horretan interesa duten erakunde guztiekizango dute komunitatera gehitzen joateko aukera.
Bigarren fase honi hasiera emateko, azaroak 18an “Abiatze Saioa” ospatu zen Eibarren. 17 erakunde desberdinetako ordezkariak bildu ziren bertan: orain arte proiektuko kide izan direnak ez ezik, proiektuan interesa agertu duten beste 12 erakunde berri ere bertaratu ziren. Orain arte egindako prestatze lanak ezagutzera eman ziren saioan, eta horrekin batera, 2017an emango diren urratsak zeintzuk izango diren ere argitu zen.
Aurrerantzean, proiektuan parte hartu nahi duen erakunde orok www.jendaurrean.eus webgunearen bitartez bertan izen emateko aukera zabalik edukiko du. Bertan topa daiteke, halaber, proiektuaren gaineko bestelako informazio interesgarria.
