Soziolinguistika Klusterrak Antropologiako XVII. ASAEE Kongresuan parte hartu du, Kanariar Uharteetako San Cristobal de la Laguna herrian. Antropologia konprometituak leloa izan du Kongresuaren edizio honek, erronka sozial, ekonomiko eta ingurumenekoak aztertzeko. Antropologia konprometituak dimentsio teoriko, metodologiko eta aplikatuak uztartzen ditu, aniztasunean eta ingurumenarekiko errespetuan oinarrituta.
Jakina, hizkuntzen zaintzak ere garrantzi handia du ikerkuntza konprometitu eta arduratsuan. Soziolinguistikari lotutako gaiak espreski landu dira Aniztasuna, desberdintasuna eta hizkuntza: esperientzia, erronkak eta hausnarketak antropologia linguistikotik sinposioan. Eta euskal soziolinguistikaren eremuko hainbat ikertzaile eta adituk parte hartu dute bertan. Tartean, Olatz Altunak eta Jaime Altunak “Bilbon euskaraz hazi. Una aproximación antropológica a las vivencias y prácticas lingüísticas de madres y padres jóvenes de Bilbao” izeneko aurkezpena egin dute, Soziolinguistika Klusterrak landutako Haur txikiak dituzten gurasoen hizkuntza-bizipenak, -praktikak eta harreman-sareak proiektuan oinarrituta.
