Hizkuntza Aniztasuna Sustatzeko Sareak (NPLD) gosari-ekitaldia antolatu du Bruselako Eskoziaren Etxean, Europako Hizkuntzen Egunaren biharamunean, irailaren 27an.
Antolatzaileen eta Europako Batzordearen ordezkariaren sarrera hitzen ostean, Soziolinguistika Klusterreko Asier Basurtoren hitzaldia izan da ekitaldiaren eduki nagusia. Bertan, hizkuntza gutxituetako hiztunen aktibazioa eta hizkuntza-ohituren aldaketarako metodologiez jardun da, Aldahitz proiektuaren baitan garatutako Eusle metodologian arreta berezia jarrita.
NPLD sareko kideen artean eta hizkuntza gutxituei lotutako gaietan interesa duten gobernu-delegaritzekin iritziak eta balizko elkarlan aukerak trukatzeko aukera eman du ekitaldiak.
