Bat Soziolinguistika aldizkariaren 136. zenbakiak unibertsitateak, irakasleen prestakuntza-zentro diren heinean hizkuntza-politika, hizkuntza-sozializazioa eta kontzientzia soziolinguistikoa lantzeko laborategi gisa duten garrantzia jorratu du. Bertan bildu diren artikuluek azaltzen dute nola eratzen diren hizkuntza-praktikak, nola pizten den kontzientzia kritikoa eta zein paper jokatzen duen agentziak hizkuntza gutxituen normalizazioan. Irakaslegaiengan hizkuntza-egoera desorekatuen aurrean eragile izateko kontzientzia kritikoa eta aktiboa piztea bilatzen duten lanak dira, aldizkarikoak.
Funtsezko gai honi eskainitako artikuluak honakoak dira:
- Kontzientzia soziolinguistiko kritikoa eta agentzia euskararen aldeko mudantza prozesuak garatzeko: ikerketa-ekintza parte hartzaile bat unibertsitatean Jone Goirigolzarri Garaizar, Ane Ortega Etcheverry
- Murgiltze Astea. Euskal Herriko Unibertsitateko irakaslegaien hizkuntza-kontzientzia kritikoa pizteko esku-hartze ikerketa Garbiñe Bereziartua Etxeberria, Miren Artetxe Sarasola
- Irakasleen profilaren garapenean euskal kulturaren lanketaren ekarpena: irakaslegaien ikuspegia Letizia Garcia-Fernandez, Marta Quintas-Quintas, Eneritz Garro Larrañaga
- Kontzientzia soziolinguistiko kritikoa eraikitzen: esperientzia bat irakasle-eskolako ikasleekin Iñigo Arteatx Uriarte, Maite Garcia-Ruiz
Horrez gain, GUREAN atalean ekarpen mamitsua egiten duten beste bi lan ere jasotzen dira:
- Etorkin latinoen integrazio soziolinguistikoa Gipuzkoan Laburpena Belen Uranga Arakistain
- Euskararekiko eta euskararen irakaskuntzarekiko jarrerak. Azagrako DBHko irakasleen kasua Iraia de la Torre Landera
Soziolinguistikaren munduko leihoa atalean, HABE liburutegiarekin lankidetzan, soziolinguistikari buruzko lau liburu hautaturen erreseinak aurki daitezke.
Bat Soziolinguistika aldizkaria urtean 4 zenbakitan argitaratzen da, paperean eta formatu digitaletan (PDF eta EPUB). Harpidetza eginez eta epostan edo etxean jasota edo ale solteak webgunean erosiz irakur daiteke. Artikulu bat argitaratu nahi izanez gero, zehaztutako prozedura eta irizpideak jarraitu behar dira.
