Voluntariat per la llengua (VxL) izeneko programa Kataluniako Generalitateko Hizkuntza Politikako Zuzendaritza Nagusiak zuzentzen du eta Hizkuntza Normalizaziorako Partzuergoak kudeatzen du lurralde katalan osoan banatutako hizkuntza-normalizazioko 22 zentroren bidez eta 22 dinamizatzailerekin —zentro bakoitzeko bat—.
 
VxL programaren helburua da katalanezko mintzapraktikak egitea elkarrizketaren bidez.  Voluntariat per la llenguaren bidez, harremanetan jartzen dira ohiko katalan-hiztunak (voluntari-ak) katalana gutxi menderatzen duten eta ikasi nahi duten pertsonekin (aprenent-ak). Hala, bikote linguistikoak sortzen dira gutxienez 10 orduz (astean ordubetez eta hamar astez) nonahi, noiznahi eta nahi dutenari buruz hitz egiteko elkartzen direnak. Programan adin nagusikoek baino ez dute parte hartzen.
 
Bikote linguistikoek, gainera, hizkuntzarekin eta kulturaren eta lurraldearen ezagutzarekin lotutako jarduera osagarrietan parte har dezakete. Horretarako, Katalunia osoko erakunde eta establezimenduen laguntza du VxL programak.
 
Pixkanaka, hainbat esparrutara zabaldu da VxL, hala nola enpresara, osasunera, justiziara, kirolera, dibertsitate funtzionalera eta erlijio-aniztasunera. Eskolak eta institutuak dira VxL-ren beste jarduera-esparru bat, adin txikiko ikasleen arteko bikote linguistikoak sortzen baitira ikastetxeetako irakasleen laguntzarekin.