Tokian tokiko euskarazko agerkariak sortzeko tresna propio bat da, software librean, etengabeko berrikuntza eta eduki-, inbertsio- zein teknologia-mailako saretzea helburu hartuta. 

Toki komunikabideek hainbat arazo izan ohi dituzte haien edizio digitaletan puntako teknologia erabili ahal izateko:

• Baliabide eskasia eta teknologiaren ezagutza falta

• IKTek eskatzen duten etengabeko inbertsioari aurre egiteko finantzazio arazoak

• Tokiko euskarazko esparrura egokitutako tresna egoki falta

• Dispertsioa, atomizazioa eta, ondorioz, sinergiak aprobetxatzeko ezintasuna. 

Euskarazko toki komunikabideek haien presentzia digitala ziurtatzeko zituzten zailtasunak ikusita, plataforma digital komun bat sortu dugu, tokiko agerkari digitalak sortu eta edukiak, teknologia zein abiada azkarrean aldatzen den teknologiak astintzen duen gure sektorearen etorkizunaren inguruko gogoetak etengabe partekatzeko tresna gisa. Plataforma horrek, agerkariak erraz sortzeko aukeraz gain, toki komunikabideek bakarka nekez irits zitezkeen teknologiak ere eskuratzeko aukera ematen die, inbertsioak eta garapen bideen inguruko gogoeta partekatuz. Sinergiak aprobetxatzea da oinarri eta helburu.