Ai’ta ! kolektibo militante bat da, eta desobedientzia zibilaren teknikak erabiltzen ditu bretoierari leku handiagoa emateko gizartean. Gutunak, bilerak, mobilizazio-kanpainak (eskaerak, protestak lurrean etzanda jarrita, bozketak, blokeoak…), ekitaldi pedagogikoak edo jai-girokoak eta abar egiten ditugu.
Ai’ta ! kolektiboaren helburu nagusia da bretoiera defendatzea eta sustatzea, hizkuntza horrek bizirik jarraitu dezan gizarteko arlo guztietan. Horretarako, ezinbestekoa da denei aukera ematea bretoiera bizitza publikoan ikusteko, entzuteko eta hitz egiteko… Eguneroko bizitzan erabili ezin den hizkuntza bat hiltzera kondenatuta dago; hori dela eta, eskatzen dugu bretoiera eta haren hiztunak errespeta daitezela Bretainia osoan. Horregatik, ezinbestekoa da gure hizkuntza ofizial bihurtzea.

Bretoiek bretoiera berreskuratzeko bide horretako ezinbesteko etapa horren zain, kolektiboari ez zaio imajinaziorik falta, eta hainbat eta hainbat ekintza egiten ditu ahalik eta jende gehiena informatzeko eta bretoierak gizartean duen lekua garatzeko. Baina, betiere –eta hau garrantzitsua da–, umore onarekin, espiritu ludikoarekin, erabiltzaileen errespetuarekin eta, sarritan, haien babesarekin. Izan ere, Ai’ta !-k ez-indarkeria aktiboa hautatu du esan beharrekoa esateko eta entzuna izateko.