AIZU! oinarrizko euskaraz idatzitako aldizkaria da, euskara ikasten ari den edota euskaraz irakurtzeko ohiturarik ez duen ororen lagungarri. AEK-k argitaratzen du.  Ikasleentzat ez ezik, euskara irakasleentzat ere eskolarako material iturri garrantzitsua da.
 
AIZU! Aldizkariak 25 urteko ibilbidea egina du, oinarrizko euskaran idazten den argitalpena dugu: euskaraz irakurtzeko ohiturarik ez dutenei zuzenduta, eta, bereziki, euskara ikasleei. Urtean 10 ale argitaratzen dira, eta kioskoetan nahiz liburutegietan eskuratzeaz gain, harpidetza bidez ere jaso daiteke.
 
Ikas-prozesua azkartzeko bidea ere bada, eta ikasgelatik kanpo erabil dezaten eskaintzen zaien tresna. Ikasleak irakurmena lantzen du, euskarari tarte gehiago eskaintzen dio, eta euskal mundura zuzenean hurbiltzen da: pertsonaiak, kultura…
 
AIZU! Aldizkariak, batez ere, gizarte eta kultura gaiak lantzen ditu, erreportaje, elkarrizketa eta albiste laburren bidez. Komikiak, denbora-pasak eta euskal gramatikaren inguruan sortzen diren zalantzak argitzeko txokoa ere biltzen ditu bere orrietan, eta AEK-ko ikasleek egindako lantxoak ere argitaratzen dira tarteka-marteka. Testu guztiak daude euskara errazean idatzita eta hiztegi sarreratxoen laguntza dute, hitz eta egitura zailenak ulertu ahal izateko. Guztira, hilean 11.000 aletik gora banatzen dira ikasle, irakasle eta harpidedunen artean.