Iniciativa pol Asturianuk, Conocer Asturias-ek eta Producciones Gomeruk bultzatzen dute “Iniciativa pol Asturianu nes ondes” eta “Alderiques d’asturies” proiektua.

Bi alde ditu proiektuak:

“Iniciativa pol Asturianu nes ondes” irratsaioa, zeina Internet bidez ez ezik, Asturiasko beste 12 irratitan ere ematen baita, astero, zenbait hitzarmen direla medio. Itun horiei esker, Internetik ez duten milaka lagunek entzuten dute saioa.

“Alderiques d’asturies”, berriz, geroago sortu zen. Hizkuntza nagusi asturiera duen onlineko lehen telebista-kanala da, eta programazio independentea, bizia eta adin guztietarako modukoa du. Duela hilabete batzuk, LTDren eta Asturiasko kable bidezko telebistaren bitartez ere ematen ditu programak.

Iniciativa pol Asturianurekin lotura duten zenbait taldek finantzatzen eta kudeatzen dituzte bi proiektu horiek.

Asturiasko hizkuntzaren normalizazioaren eta haren hiztun diren herritarren hizkuntza-eskubideen alde dihardu Iniciativa pol Asturianu GKEak 2011az geroztik, sortu zenetik, alegia. Gure ustean, Asturiasko gizartearen egituratzaile gisara jardun behar du asturierak, eta zeharkakoa izan behar du haren erabilerak. Horrenbestez, hizkuntza hori normalizatzeko behar diren neurriak hartzera bultzatu behar dira erakunde publikoak, elkarte pribatuak eta gizarte zibila, Asturiasko gizartearen nortasun-elementua da eta, bai eta kultura- eta ekonomia-ondarearena ere. Alor politikoan eta sozialean adostasuna eta elkarlana sustatzen ahalegintzen da Iniciativa pol Asturianu, jorratu gabeko eremuak lantzen, eta Asturiasko, Espainiako estatuko, Europako eta nazioarteko erakundeetara helarazten Asturiasko hizkuntza-gatazkaren berri.