Auzo-eskola bat eraiki nahi izan da oinarri bezala hartuta haurren euskalduntzea eta auzoan dauden bizilagun guztien inklusioa.

Gasteiz eremu erdaldunean kokatutako hiriburua da. Euskarak oso presentzia txikia du kalean. Hala ere, 80. hamarkadatik hona, etxetik erdaldunak diren guraso gehienek euren seme-alabentzat euskaraz murgilketa erabatekoa egiten duen hezkuntza eredua (D eredua) aukeratzen dute. Migratzaile kopurua, 2002. urtetik hona modu mailakatuan igo da, ia %10eko kopurura igo arte.

Bertakoek egiten duten kontrara, migratzaileek seme-alabentzat eskola publikoa eta batez ere euskaraz murgilketa partziala (B eredua) edo gaztelaniaz ikasten den eredua (A) aukeratzen dute. Erabaki horren atzean arrazoi konplexuak daude eta erantzukizuna eragile askorena da. Honela, ez da bultzatzen migratzaileen euskalduntzea eta hiritar guztien elkarbizitza, zenbait eskola publiko eskolak ghetto bihurtzen baitira.

Ramon Bajo Gasteizko Alde zaharrean kokatutako ikastetxe publikoa da, non urte luzetan A ereduan irakatsi den.  Goian azaldu dugunari jarraiki, 2002. urtetik bereziki etorkinen seme-alabak baino ez ziren matrikulatzen eskola honetan eta auzoan bizi ziren bertako jatorria zuten gurasoek (lehen hizkuntza euskara nahiz gaztelera izan) D eredua eskaintzen zen inguruko auzoko ikastetxeetara eramaten zituzten euren seme-alabak. 2006an ikastetxe hau D eredura aldatzeko prozesua sustatu zuten auzoko guraso euskaldun batzuek, baina irakasleekin eta jatorri etorkina zuten gurasoekin elkarrekintza erabakigarria izan zen euskalduntze prozesuan. Egun, auzoko eskola honetan D ereduan irakasten da eta ghetto izateari utzi dio eskolak. 

Nahiz eta badugun gure historian aurrekaririk, kultu-aniztasun egoeran euskararen sustapena erronka berria eta handia dugu. Bertako gurasoen inplikazioa erabakigarria da euskara erdigunean egotea berma dadin, beti ere, besteek dakarten kultura eta hizkuntzak kontutan hartuta.