Saltatu eduki nagusira

Maite Correa Colorado State Universityko ikerlaria Soziolinguistika Klusterrean izan da

Maite Correa trintxerpearra Linguistika Aplikatuko irakaslea da Koloradoko Unibertsitatean, eta urte luzez aritu da Ameriketako Estatu Batuetan ikertzen, gaztelania ondare-hizkuntza (lenguas de herencia / heritage language) gisa irakasteko prozesuez eta ikasleen hizkuntza-jarrerez, -erabileraz eta -beharrez.

Otsailaren 9an, Soziolinguistika Klusterraren bulegoan bildu da ikerlaria Imanol Larrea eta Maialen Iñarra Klusterreko kideekin. Bi aldeen ikerketa-ildo nagusiak partekatu eta, aurrera begira, proiekturen batean lankidetzan aritzeko aukerak aztertu dituzte. Bilera honen bidez, 2022ko uztailean Belgikan egindako 24. Sociolinguistics Symposium-ean elkarri emandako hitza bete eta harremana estutzeko bideari ekin zaio.

Uneotan, Trintxerpeko errealitate soziolinguistikoan sakontzen ari da Maite Correa. Eremu geografiko txiki batean (6000 biztanle inguru) lau hizkuntza-komunitate nola bizi diren aztertzen ari da: bi hizkuntza ofizialenak (euskara eta gaztelania) eta beste bi ondare-hizkuntzarenak (galegoa eta portugesa). Horretarako, hizkuntza-paisaia aztertzeaz gain, teknika kualitatiboak erabiltzen ari da, hainbat trintxerpearren hizkuntza-irudikapenak bildu nahian.

BI ASTEAN BEHIN
ZURE EMAILEAN