Edubreizh bretoiera ikasteko dagoen onlineko plataforma bakarra da.

Bretainiatik kanpo bizi arren edo eskoletara joateko aukerarik ez izan arren bretoiera ikasi nahi duten ikasle helduei zuzendua dago plataforma.

Interneten ez dago bretoieraz idatzitako eduki pedagogikorik, eta, beraz, gabezia hori bete nahi du plataformak.

EduBreizh-ek teknologia berriak baliatu ditu bretoieraren onlineko irakaskuntza garatzeko eta, hala, noiznahi eta nonahi hizkuntza-baliabide pedagogikoak eskura nahi dituzten ikasleen eskaerari erantzuteko.

Erabiltzaileek harpidetu egin behar dute plataforman, eta, behin hori eginda, Oulpan metodo berritu eta aberastuan oinarritutako baliabide pedagogiko osatu bat erabiltzeko aukera izango dute.

Hala, ikasle internauta 300 baliabide pedagogiko multimedia baino gehiago dituen trebakuntza-plataforma batean sartuko da, eta aukera izango du elkarrizketak lantzeko, errepikapen-ariketak egiteko, norberak zuzentzeko moduko testak egiteko, gramatika-modulu multimediak lantzeko eta zenbait egoera praktiko aztertzeko.

Plataformak aukera ematen du aditu batek zuzendutako eskola birtualetan ere parte hartzeko, eta, halakoetan, ahozko zenbait jarduera pedagogiko egin ditzake ikasleak, debora errealean.

Halaber, EduBreizh-ek ikasleen arteko harremana ere sustatzen du, txaten bidez, esate baterako.

Ikastaroetan parte hartzeko, izena eman behar da EduBreizh-en (2012tik 2015era, aldi batez, doan eskaini ziren ikastaroak).