Haur hezkuntza eleaniztuna bermatzeko ekimena da, hezkuntza formala beren ama hizkuntzan jasotzeko aukera ez duten ume kurduentzat. Hezkuntza eleaniztuna eskaintzen dugu, ama hizkuntzan oinarritua: haur-hezkuntzako umeek beren ama hizkuntzan hasten dira, eta ingelesa eta ondoko dialektoa ikasten dituzte konparazioan oinarritutako metodo baten bidez.

Ibistane Azad izena daukate ikastolek Ipar Kurdistanen. Eskola Askeak. Ama hizkuntza debekatua duen estaturik gabeko nazio handienean, ume koskorrak kurdueraz mintzatzen hasi dira. Mintzatzen eta ikasten. Duela gutxira arte pentsaezina zen halakorik klandestinitatean kurduerari eutsi diotenentzat, edo jadanik, asimilazio politiken ondorioz, hizkuntza guztiz galdua dutenentzat. Diyarbakir hiriburuan, bi milioi pertsonako hirian, jada bost eskola daude martxan. Ferzad Kemanger izena darama horietako batek; Iranek urkatutako irakasle kurduaren omenez.

Ipar Kurdistanen iaz zabaldutako aurreneko hiru eskoletako bat da Ferzad Kemanger. Ikasturte honetan, urrats sendoago bat egin, eta lehen hezkuntzako beste 11 ikastola jarri dituzte martxan. Hakkarin, Sirnaken, Mardinen, Cizren, Yuksekovan… Guztira 750 ikasle ari dira bertan kurdueraz ikasten.

Eskolak legez kanpokoak dira, eta baldintza gogorretan ari dira lanean, baina, hala ere, zabalik daude; behin baino gehiagotan itxi dituzte, eta berriz zabaldu dituzte; irakasleak ere atxilotu izan dituzte, baina hor jarraitzen dute: bizirik. Udalek ez daukate eskumenik hezkuntzaren alorrean, baina egungo statu quo-aren gabeziak baliatuz, beren kabuz jarri dituzte martxan eskolak. HDP Herriaren Alderdi Demokratikoak mila bat udalerri eskuratu zituen udal bozetan eta, mugen gainetik, autonomia horri esker ari dira kurduera hezkuntza-sisteman txertatzen.

Eskola hauetan Kurdueraz egiteaz gain, haurrak parekidetasunean eta ingurugiroarekiko errespetuan oinarrituz hezten dituzte.